Prasasti Pande Bang 20-21

20. ling ira sang prabu “singgih sang maha muni, tan iwang kaya andika sang maha muni. wetning anak ira dating marangke, tapwan waneh anak sang maha muni, aptya aneda sinanmata asurud ayu lawan pada sang maha muni, tulusakena dresashita ri kadi mami, tinapakena mistaken ing ulun, maran ana sih wara nugraha kalan ing ulun mangke”. sumahur ta sang mpu lulumbang “sadnya ta sri parameswara ulihakena tang hredaya aji, tan kawenang kadi ki prabu asurud ayu ri hong manira, tan lingen lawan ala ayu ing praja, apan kramaning kadi kita prabu, angungsir suka wibhawa, tulya angungsi wisya ya pinahan juga rumuhun, apan dharman ing kadi kami amagehaken kanisresrayan, wenang aninggala kadaton, mangkana ulah ira sang menget ring sarira”. “sandya sang muniswara, dyapi mangkana kaya linganta, aninggalaken kadaton, manira maneda bhawa cakra sang muni”. umatur sang mpu lulumbang “singgih sang prabu, yen kedeh karsa parameswara, brahmana aji tumut kaya linganta, apan sakeng wara nugrahan sang prabu asewa ayu. anging darakakena manahta aywa ima. anak sampun angiringa manka payun ikang alapakena.” wekasan ana ling ira adi guru, apa ta lwirniya nihan “duh nanak mami sang prabu, rengakena udesa kami mangke, kita nanak akonakena de ramanta, ayoga mangke, anyatosangapa ri nalwin ing kidul, nihan kramanta ayoga mangke”. atur sang prabu “ aneda ngiring ranak maha mpu”. neher tumuli sang maha muni ayoga, tan kurang ing parikrama, sauwen denira ayoga. tatan ana pawarah sang sinuhun lawan sang pinaka sisya. alama denira sang prabu, anganti anyantosagama maring salwan kidul, malar tan ana ling sang maha muni. ya etun ing umarek lawan sang adi guru, laju pwa sira umatur “sadnya sang maha muni, aparan etuniya tan ana wara nugraha sang sinuhun lawan kadi kami, anggen pwa den nanak ira anganti”. ling ira sang maha guru “pamuliha ta kita nanak prabhu rumuhun, ana panugrahan sira raman ira”. apan mangkana umantuk sang prabhu mamwat ing sang adi guru, neher sira lumampah iring-iring ing bala mantri.
21. tan koningang lampah nira ring awan, agya prapta aneng pasaban, tumuli araryan, inuring-iring bala mantra ri baneng taru wandira areneb, apan irika kayogya pasayuban ing wang kapanasan. tan lingen pagonitan asya krana sang prabu lawan sang mantri, wekasan ana ling sang prabhu : “ai patih lah rasanana mangke, umarek lawan sang abra sinuhun, aneda lugraha”. tar wihang pwa sira rakyan patih kinon, amwit tumuli mangkat, saha anunggang kuda, saru dera lumaku. tan koninga lumampah ira sang pinaka duta, katapakena sang prabu lawan lebar tangkilan ira , sang mantra pada angungsi kuwuniya sowing-sowang. kunang snag patih mantuk ing pura, sinungsungan de para biniyaji, tan lingan margan ira pasotan ing ratu mahotama. katakana mwah sang pinaka duta, sadateng nira laju pwa sira umatur lawan sang adi guru “pasang tabik pwa sang patik maha dwija, wetning kinon umatura de sang anak, aparan nimitan ing duran ana sinanmata sang maha muni, sukma cintya lawan sang nanak”. asemu kagyat sang adi guru, ling ira “aih..patih uwus ana panugrahan ingulun lawa nanak prabhu, kunang yan i nanak predo, ana taru waringin aneng pasaban, ya takwanakena paweh manira”. sumahur ta ya apan dahat ing mapingit, lah patulakakena mangke. garjitata sang patih, tumuli amwit kapwa sira, walwiya mantuk ing pura. sadateng ira kang patih, umatura lawan sang prabhu “singgih paduka parameswara, ana rakwa sampun paweh ira sang abra sinuhun, dumatanga sri maha raja aken tumanyakena kang taru waringin”. ling ira sang prabhu :huh..yan mangkana, daran paparanga tumakwena tang taru waringin”. tar wihang kapwa sira. tumuli mijil sang prabhu, inuring de rakyan patih, tinakwanan tang taru waringin, sumahur sang taru wandira “yan sampu anan ing pasung sang pandya lawan sang prabhu, aywa sangsaya, uwus tiba ring angga sang prabhu, aksara tri tatwa juga.


dikutip dari :
prasasti pande bang
sumber : gedong kirtya no. 4821
druwen : puri ngurah, sibang kaja, abiansemal, badung