Sundari Bungkah "22-24"

22.a. katulis untuk bagawan panyarikan, jaksa, jejeneng, pasek dangka, ngukuhin, duaning ida munggah menek lingga, menek saji makadi sekah, tan sah linggihang ida adi purnajiwa, tan mari ida maurikin kadharman, sampunang lali ring angga sarira, patut tumusang pisansane ring jaba kalawan ring jero, patut tunggalang, satata sabda bayu idep, sane medal ring muncuk lidahe, pamekas lidahe, urung-urung gending, papusuhan, ati, limpa

22.b. paparu, bebuahan, punika sane marupa pitara ring raga, nyali marupa panataran majapahit, punika patut sikiang ring angga, sampunang caluh-caluh, sampunang lali ring palinggih, sapuniki pangandikan ida sanghyang indra, yen idewa obah ring palinggih, masolah boya-boya, loba angkara, masolah corah, tan mapakayun sang putus, masolah rusit ring anak luh lianan, malih ngrawos bangras, salah-salah marebat, salah-salah ngacepang anak istri, malih ring semeton mantu, edan prana kabawos punika, taler kabawos cabul,

23.a. kabawos romon, yening sapunika ibuk paling kayun sang malinggih, boya ida kadi anak patut kabaktinin, mawastu leteh panagaran ida sang prabu, karusak antuk dewa pangruge ring kahyangan, maliha katah panyakit rawuh ring paradesa sami, kaletehan sang brahmana, olih ida sang ajiwesi, kapastu olih ida sang batara indra, madak ida sang wiku dados bojog, ida sang istri kapastu olih ida batara wisnu, mangda dados irengan, parisentanan ida sareng keni sami,

23.b. pastun ida sanghyang indra, kasabatang sang brahmana punika, karawuhing putra putun ida, yen ida bagawan astiti ring kahyangan, sayang asih ring pasemetonan, malih ring kadang warga, tumuli ngandika ida batara indra ring ida bagawan, benjang-benjangan idewa jaga madeg agung, yen idewa makayun mangda pageh muponin kapurusan parisentanan idewa, idewa salampah laku, wenten santanan idewa madeg agung, sampunang pisan ngimpasin kecap aksarane, kasungkemin antuk ida ajiwesi, sapunapi swakaryan ida sang ajiwesi, ida makarya mamande

24.a. besi, ida ngamargiang usada, kecap sastra saha tatabasa, ngajahang agama malih tenung ring anak sakit, parisolah anak prajnyan, ngamargiang sepat patitis, siku-siku pameneh, puniki sane kasungkemin kunggahang kadadosan acakep, puniki kecap aksara puja mantra, anggen ngaskara, anggen pangentas-entas, mantra sakti mawisesa,anggen ring kantun mahurip katekaning padem santanan idewa, sakadang wargan idewa, sane jenek ring dija-dija kemaon, puniki dados amongan sira pande wesi, asing-asing nyungkemin aksara puniki

24.b. pamekas kabawos sira pande, yening tan nyungkemin aksara puniki, boya punika pande, santukan tan tata huning ring angga sarira idewa, ngeninin hurip tekaning pati, sinah kapastu olih sanghyang agni, sang ajiwesi tedun kamayapada, ida dados sira pande wesi, katah lelintihan ida sira pande makadi sor kalawan luhur,

Sundari bungkah, bersambung. . . . . . .