Wednesday, February 11, 2009

Sundari Bungkah "16-18"


16.a. tenung usada, kandan paribasa, sepat siku pameneng, puniki dados uger-uger yen anake mamande besi, benjangan yen sampun sira pande husan mahurip utawi padem, puniki pajenenganne wajikin, anggen mresihin sawane punika, salwir malan ipun, salwir dosan ipun bresih sami karuat, sami pada udep, yen tan tirta pajenengane kanggen mrastita sawan sira pande, boya kadi sawan sira pande, nanging pateh kadi sawan anak sudra ipun, taler kadi bangken ubuhan ipum, yen sira pande eling ring katurunan ida
16.b. sira pande, eling ring kapandean, maraga batara brahmarsi, sampunang idewa lali ring pinget ida batara brahma, duaning kawentenane marupa tunggal pajenengan, sane mawasta senjata eng (gambar), sakancan wargan sira pande, puniki sane patut katuwutang antuk sira pande, sakancan sane ngalinggayang pajenengan idewa, yan tan pada nganutin sapangandikan ida batara brahmarsi, palan ipun jaga rusak sira pande, sapunika pawarah ida batara brahma, yen eling sira pande benjangan, puniki puja pangentas-entas rikala rawuh pademe, sapunika
17.a. pasemetonan sira pande, yen sampun huning ring pangentas-entas ngalinggayang puja nganggen bajra, raris ngastawa, huning ring warah-warah agama, huning ring awig-awig, taler sepat siku pameneh, ida pinaka sane kamanggehan dados mresihin leteh-leteh atman ida sira pande, anggen kahuripan, anggen pembonan, sang detya kalamertyu jiwa sujatin ipun, sampunang malih idewa nunas ring sang brahmana lianan, napi awinan duaning sang brahmana sang brahmana durung huning nguripang besine, nguripang gangsa, yen sang brahmana sampun huning
17.b. ring nguripang besi, taler tan kayun ida sang brahmana nganggen sungklit, raris ngentas sawan sira pande, raris susud kabrahmanan ida, karawuhing sang prabu, keni surud pikolihan ida, rawuh maka sami telah gading, duaning sira pande marupa kasakten ida sang prabu, taler dados hurip manusa, pawarah ida batara brahma, yen pawikan ida sang prabu sane ngambel jagat, sampunang ngadukan pande punika, mawastu rusak pakolihan sang prabu, sapunika wacanan ida batara
18.a. brahmagni loka, kapastu olih hurip wesi, punika aksara sane kasungkemin antuk sira pande, wenten wacanan ida batara brahmagni, ring sira mpu bawula, malesat ida raris ida dados ula agung, ida dados naga basukih, jati sakti mawisesa, malesat ida naga basukih dados raja dewata, tedun ida ke mrecapada maraga arca ida, sane wenten ring dalem purwaka, mawinan wenten panyungsungan manusa, kasiwi antuk jadma maka sami, saking latun ida
18.b. batara brahmakawi, mijil rajawesya, wenten mangkin watek pamangku, pamangkun ida dalem purwabumi, wenten nututin mijil, mawasta rajaksatrya, wenten pangamong ida dalem purwaka, wenten taler dalem maspahit, wenten malih bagyan-bagyan ring maspahit, puniki marupa pancer ipun ring maspahit punika, wenten ratu ring maspahit, maparab sang ratu putra, paican ida batara karo, barak ring selem, wenten rajaputra sinarengan ida mijil

Sundari bungkah, bersambung. . . . . . .

No comments:

Post a Comment