Prasasti Pande Kesian "22"

Kunang wehira Ida Dalem Sri Maharaja Smara Kepakisan, nira murdhaning bhumi Bali sadaya, asumedi maring Gelgel, agelis pwa sira anorat maring puri Sweca Pura, wuus sudha kasaksinan de pandita muang siwa bhuda bhujangga rsi, mpu rsi muah para rsi, para ratu, para arya sadaya kateken para anglurah, muah diniring de para pasek muang bendesa sahumku wong Bali dwipa mandala. Duka kala saka yusaning bhuwana pandita rasa guna, candrama srawana masa, sukla paksa anemu purnama warah kuningan rahina ca, ka. Si Arya Manuri, Kuda Pangasih ngaran nira waneh ika kinon nira, dening Dalem anorat maring puri Sweca Pura. Kunang heling Dalem mandira murdaning bhumi Bali sadaya asumedi maring Gelgel, wuus suddha anugraha sewala patra piagam maka taktakan. Brahmanda Pandita Siwa wangsan nira, muang kasetrian sira jiwaning prajurit wit Medungkara Herlangga, Janggala Kadiri muang Lalumbang, Tumapel ngaran. Muang maring Wilatikta. Kawekasan tedun muah maring Bali raja, Papareng Ida Dalem Ketut Sri Aji Kapakisan deniring de para arya prajurit Majapahit sadaya. Sira pratisantananira Mpu Brahmanda Pandita Siwa Saguna rumaga pandita suryaning bhumi kabeh. Sakeng piwekas krian Mahapatih Wira Gajah Mada. Kunang sewala patra piagam iki, wara nugrahanku aku Dalem Gelgel pitik apuspata Ida Dalem Ketut Sri Smara Kapakisan, maka murdhaning Bali raja sadaya, suddha anugraha sewala patra yagem, maka tatakan muah lepitan kapanditan, kasatrian muang kaprawiran trus tumus tekeng turun tumurun, pratisantana kasantanan nira Ong tabe hulun nira, pratisantananira Mpu Brahmanda Pandita Siwa Saguna.

Kunang wara nugrahanku ring para arya sadaya wenang sira humadeg papatihku, kita para arya prasama wenang sira umasuking para desa-desa, lamakana wong Bali Aga langgana maring mandira, aja sira pasha ring Brahmanda Pandita Haji Wesi muah ring Arya Kapandian muah Ki Lurah Kapandian, apan sira susaktining sang ratu anyakrawerti katekeng baudanda tanda mantra, punggawa lurah sadaya. Hapan sira Pande Haji Wesi merta uriping bhumi kabeh, maha sudha sakaryaning sang catur wangsa, apan sira angaduh dharmaning kapandean anunggal akena, uriping waja wesi muang panglebur gangsa kenaka rupiaka sarwa ratna lamakana suka wirya wibhawa ikang bhumi Bali raja sadaya. Mangkana ling Dalem aja kita pido, kengetakena juga warahku iki.

Kunang sira Arya Kenceng humadeg pepatih ring Tambangan Badung, papareng anak sira Si Arya Tegeh Kuri harinira Si Arya Tabanan maring Tabanan. Ki Arya Bleteng maring Munduking Jurang, tekaning Sapagunungan, kunang saprayinira prasama kaparahan, hana ring Bungaya hana ring Tulikup, hana ring kapal. Si Arya Belog maring Kaba-Kaba. Hana ring Sidemen, hana ring Kalianget Si Arya Gajah Para, maring Tianyar. Muah Si Arya Pangalasan maring Bedahulu. Si Arya Nyuh Aya muang Si Arya Asak maring Karangasem, tangeh yen winilang, para arya umadeg patih umasuking desa para desa, papareng lawan sira Si Arya Ngurah Kapandean.

Kunang sutanira Mpu Brahma Siwa Saguna, Dalem Pandia Tusan, ibunira arin Dalem Majapahit turun akena Dalem Pande Mahiga Wesi ibunira saking putran Dalem Samprangan, asasana maring Kentel Gumi Tusan, hana suta ruang siki, laki-laki ngaran Sang Satria Pande Wesi, sira anreh akena putra akueh, para Arya Kapandean. Harinira Sang Satria Baja Wesi as asana maring Gelgel maring Sila Duara, sira anreh akena putra akueh muah para Arya Kapandean muang Lurah Kapandean.

Prasasti Pande Kesian bersambung . . . . .